اقوامِ متحدہ کے خصوصی ماہرین نے پاکستان اور بھارت کے درمیان کشیدگی اور مئی 2025 میں ہونے والی فوجی کارروائیوں پر ایک تفصیلی رپورٹ جاری کر دی ہے، جس میں بھارت کے یکطرفہ اقدامات پر سنگین قانونی سوالات اٹھائے گئے ہیں۔
رپورٹ میں پہلگام حملے کی شدید مذمت کرتے ہوئے ذمہ دار عناصر کو قانون کے مطابق سزا دینے پر زور دیا گیا ہے۔ اقوامِ متحدہ کے ماہرین کے مطابق پاکستان نے اس حملے میں کسی بھی قسم کے ملوث ہونے کی سختی سے تردید کی اور غیر جانبدار، شفاف اور بین الاقوامی تحقیقات کا مطالبہ کیا۔
خصوصی ماہرین کی رپورٹ کے مطابق 7 مئی 2025 کو بھارت نے “آپریشن سندور” کے نام پر پاکستان کی حدود میں فوجی طاقت استعمال کی، جو اقوامِ متحدہ کے چارٹر کی صریح خلاف ورزی ہے۔
رپورٹ میں یہ بھی واضح کیا گیا ہے کہ بھارت نے اقوامِ متحدہ چارٹر کے آرٹیکل 51 کے تحت سلامتی کونسل کو بروقت اطلاع نہیں دی، جو بین الاقوامی قوانین اور طے شدہ عالمی طریقۂ کار کی خلاف ورزی ہے۔
