ممبئی : (ویب ڈیسک) سینئر بھارتی صحافی اور معروف ویب پورٹل دی وائر کے بانی ایڈیٹر سدھارتھ وردراجن نے مودی سرکار پر کڑی تنقید کرتے ہوئے لکھا ہے کہ مودی نے سیاسی فائدے کیلئے خطرناک راستہ اختیار کیا۔
انہوں نے نریندر مودی کی قیادت میں کیے گئے آپریشن سندور کو غلط اندازوں پر مبنی ایک خطرناک حکمتِ عملی قرار دیا، مودی حکومت چاہے تو یہ تاثر دے کہ پاکستان امریکا کے پاس ’’ہمیں بچاؤ‘‘ کی دہائی دیتا ہوا گیا یا دعویٰ کرے کہ بھارت نے اپنے تمام مقاصد حاصل کر لیے لیکن حقیقت یہ ہے کہ مودی نے ایک ایسا قدم اٹھایا جس کا نتیجہ ناپسندیدہ مگر مکمل طور پر قابلِ پیش گوئی تھا۔
انہوں نے بھارتی فضائیہ کی خاموشی پر سوال اٹھاتے ہوئے کہا کہ جب آپ یہ کہتے ہیں کہ سب پائلٹ واپس آ گئے، تو یہ اس بات کی ضمانت نہیں کہ سب طیارے بھی واپس آئے، مودی سرکار ان نقصانات کو تسلیم کرنے سے گریزاں ہے کیونکہ سیاسی سطح پر ان کے فیصلوں پر سوالات اٹھ سکتے ہیں اور عوامی رائے میں تبدیلی آ سکتی ہے۔
انہوں نے کہا کہ نقصانات کا اعتراف نہ کرنا دراصل یہ تسلیم کرنا ہے کہ یہ نقصانات معمولی نہیں تھے، آپریشن سندور کے بعد پاکستان کا مؤقف عالمی سطح پر دوبارہ سنجیدگی سے سنا جانے لگا ہے اور امریکا سمیت کئی ممالک نے کشمیر کے مسئلے کو بین الاقوامی تنازع کے طور پر تسلیم کرلیا۔
بھارتی صحافی کا کہنا تھا کہ زیادہ تر ملک سفارتی، اقتصادی اور عسکری ذرائع کو متوازن طور پر استعمال کرتے ہیں، لیکن مودی حکومت نے صرف انتخابی فائدے کیلئے جنگی بیانیے پر انحصار کیا، مودی جانتے تھے پاکستان کے خلاف مکمل جنگ ممکن نہیں، لیکن سیاسی فائدے کیلئے انہوں نے خطرناک راستہ اختیار کیا۔
