سری نگر / اسلام آباد (آواز نیوز) – بھارتی حکومت کی جانب سے مقبوضہ کشمیر پر مکمل قبضے اور آبادی کا تناسب تبدیل کرنے کا منصوبہ ایک بار پھر عالمی سطح پر ناکامی سے دوچار ہو گیا ہے۔
ذرائع کے مطابق مودی سرکار کی جانب سے دفعہ 370 کے خاتمے کے بعد جس تیزی سے کشمیری عوام کے حقوق سلب کیے جا رہے تھے، اس کے خلاف نہ صرف مقبوضہ وادی میں زبردست عوامی مزاحمت دیکھنے میں آئی، بلکہ بین الاقوامی سطح پر بھی بھارت کو شدید دباؤ کا سامنا ہے۔
اقوامِ متحدہ اور دیگر عالمی ادارے بارہا اس غیر قانونی اقدام کو انسانی حقوق کی خلاف ورزی قرار دے چکے ہیں، جبکہ یورپی پارلیمنٹ میں بھی بھارت کے خلاف قراردادیں پیش کی جا چکی ہیں۔
پاکستانی دفتر خارجہ نے بھی ایک بار پھر دوٹوک مؤقف اختیار کرتے ہوئے کہا ہے کہ کشمیر ایک متنازعہ علاقہ ہے، اور بھارت کے یکطرفہ اقدامات اقوامِ متحدہ کی قراردادوں کی کھلی خلاف ورزی ہیں۔
