ٹنل بورنگ سیوریج منصوبہ لاہور پاکستان کا پہلا ٹنل بورنگ پروجیکٹ مریم نواز ترقیاتی منصوبے اسحاق ڈار ایکنک اجلاس لاہور نکاسی آب نظام ورٹیکل اسپننگ پائپ ٹیکنالوجی EBA Engineering USA

لاہور میں پاکستان کا پہلا ٹنل بورنگ سیوریج منصوبہ منظور، 25 لاکھ شہری مستفید ہوں گے

لاہور: شہریوں کی روزمرہ زندگی میں خلل ڈالے بغیر، پاکستان کی تاریخ کا پہلا ٹنل بورنگ سیوریج منصوبہ ایگزیکٹو کمیٹی آف نیشنل اکنامک کونسل (ایکنک) نے منظور کر لیا۔ اجلاس کی صدارت ڈپٹی وزیراعظم اسحاق ڈار نے کی۔

محکمہ ہاؤسنگ پنجاب کے ترجمان کے مطابق، لاریکس کالونی سے گلشن راوی تک 32 کلومیٹر سے زائد سیوریج لائن بچھائی جائے گی، جو وسطی لاہور کے گنجان آباد علاقوں میں نکاسی آب کے دیرپا حل کے لیے ایک انقلابی قدم ہے۔ منصوبے کی تکمیل سے 25 لاکھ سے زائد آبادی براہ راست فائدہ اٹھائے گی۔

یہ جدید منصوبہ ورٹیکل اسپننگ ٹیکنالوجی سے تیار پائپوں پر مشتمل ہوگا، جن کی متوقع عمر 100 سال سے زائد ہے۔ منصوبہ مکمل ہونے کے بعد شہر میں قائم 22 سے زائد لفٹ اسٹیشنز بند کر دیے جائیں گے، جس سے وسائل کی خاطر خواہ بچت ہوگی۔

منصوبے کی پلاننگ اور ڈیزائن معروف امریکی کنسلٹنٹ EBA Engineering نے کیا ہے، اور اس کا اختتام جون 2028 میں متوقع ہے۔ سیوریج لائن کو بابو صابو ویسٹ واٹر ٹریٹمنٹ پلانٹ سے منسلک کیا جائے گا۔

ترجمان کے مطابق، یہ منصوبہ وزیراعلیٰ پنجاب مریم نواز شریف کی ذاتی دلچسپی اور وژن کا عکاس ہے، جو لاہور کو جدید، بہتر اور پائیدار شہری سہولیات فراہم کرنے کے لیے ایک اہم سنگ میل ہے۔

اس خبر پر اپنی رائے کا اظہار کریں

اپنا تبصرہ بھیجیں