لاہور: لاہور کی سپیشل سینٹرل عدالت نے سابق وزیراعلیٰ پنجاب چودھری پرویز الہٰی کے قابل ضمانت وارنٹ گرفتاری جاری کر دیے ہیں۔ عدالت نے پرویز الہٰی کی ایک روزہ حاضری معافی کی درخواست خارج کر دی۔
تفصیلات کے مطابق سپیشل سینٹرل عدالت کے جج محمد عارف خان نیازی نے منی لانڈرنگ کے مقدمے کی سماعت کی۔ دوران سماعت پرویز الہٰی کے وکیل نے مؤقف اختیار کیا کہ ان کے موکل کی طبیعت ناساز ہے اور ڈاکٹرز نے آرام کا مشورہ دیا ہے، اس لیے عدالت سے ایک دن کی حاضری سے استثنیٰ دیا جائے۔
عدالت نے وکیل کے دلائل پر ناراضگی کا اظہار کرتے ہوئے درخواست مسترد کر دی اور سابق وزیراعلیٰ کے قابل ضمانت وارنٹ گرفتاری جاری کرنے کا حکم دے دیا۔
یاد رہے کہ ایف آئی اے لاہور نے پرویز الہٰی سمیت دیگر کے خلاف نامکمل چالان عدالت میں جمع کرا رکھا ہے۔
