اسکردو میں معروف گلوکارہ قرۃ العین بلوچ ایک خوفناک حادثے کا شکار ہو گئیں جب دیوسائی نیشنل پارک میں کیمپنگ کے دوران ریچھ نے ان پر حملہ کر دیا۔
اطلاعات کے مطابق ریچھ نے اچانک جھپٹتے ہوئے ان کے دونوں بازوؤں پر پنجے مارے، جس سے وہ زخمی ہو گئیں۔ فوری طور پر قرۃ العین بلوچ کو ریجنل اسپتال اسکردو منتقل کیا گیا، جہاں ڈاکٹروں نے انہیں ابتدائی طبی امداد فراہم کی۔
معالجین کے مطابق ریچھ کے وار سے ان کے بازو زخمی ہوئے، تاہم خوش قسمتی سے کوئی جان لیوا چوٹ نہیں آئی۔ علاج کے بعد ان کی حالت کو تسلی بخش قرار دے دیا گیا اور انہیں اسپتال سے ڈسچارج کر دیا گیا ہے۔
مقامی حکام کے مطابق یہ واقعہ اس وقت پیش آیا جب گلوکارہ دیوسائی پارک میں کیمپنگ کر رہی تھیں۔ حکام نے خبردار کیا ہے کہ یہ علاقہ جنگلی حیات کے مسکن کے طور پر جانا جاتا ہے، جہاں ریچھوں کی موجودگی عام ہے، اس لیے سیاحوں کو احتیاطی تدابیر اختیار کرنی چاہئیں۔
