دبئی: ایشیا کپ ٹی ٹوئنٹی ٹورنامنٹ کا سب سے بڑا اور سنسنی خیز مقابلہ آج دبئی میں ہوگا، جہاں روایتی حریف پاکستان اور بھارت کی ٹیمیں ایک بار پھر آمنے سامنے ہوں گی۔ یہ میچ پاکستانی وقت کے مطابق شام ساڑھے سات بجے شروع ہوگا اور دونوں ٹیمیں فتح کے لیے پرعزم ہیں۔
رواں سال جنگ کے بعد پاک بھارت ٹیموں کا یہ پہلا ٹاکرا ہے جبکہ گزشتہ چھ ماہ میں یہ دونوں ٹیمیں دوسری مرتبہ ایک دوسرے کے خلاف میدان میں اتریں گی۔ اس سے قبل وہ چیمپئنز ٹرافی میں مدمقابل آئی تھیں۔
پاکستانی شائقین کی نظریں فخر زمان، صائم ایوب، سلمان آغا اور حارث پر جمی ہیں، جبکہ بھارتی ٹیم شبمن گل، سوریا کمار یادیو اور جسپریت بمراہ جیسے اسٹار کھلاڑیوں کے ساتھ میدان میں اترے گی۔
دونوں ٹیموں کی حالیہ کارکردگی بھی شاندار رہی ہے۔ بھارت نے ایشیا کپ میں متحدہ عرب امارات کو 9 وکٹوں سے شکست دی، جبکہ پاکستان نے افغانستان اور یو اے ای کو ہرا کر تین ملکی سیریز اپنے نام کی۔
ریکارڈ کے مطابق ایشیا کپ میں بھارت کو سبقت حاصل ہے۔ اب تک کھیلے گئے 19 میچوں میں بھارت نے 10 اور پاکستان نے 6 کامیابیاں حاصل کی ہیں۔ پاکستان نے بھارت کے خلاف آخری کامیابی 2022 میں حاصل کی تھی۔ ٹورنامنٹ کے اعزازات میں بھی بھارت 8 بار ایشیا کپ کا چیمپئن رہ چکا ہے، جب کہ پاکستان نے یہ ٹائٹل صرف 2 بار جیتا ہے۔
پاکستانی شائقین بھارت کے خلاف بڑے میچ سے بڑی امیدیں لگائے بیٹھے ہیں۔ دبئی میں پریس کانفرنس کے دوران قومی بلے باز صائم ایوب نے کہا کہ ٹیم اس بڑے مقابلے کے لیے پرجوش ہے۔ ان کے مطابق پاک بھارت میچ ہمیشہ ہی لوگوں کے لیے اہم ہوتا ہے، لیکن ٹیم ہر میچ کو بھرپور تیاری کے ساتھ کھیلتی ہے۔
انہوں نے مزید کہا کہ اگر کسی کھلاڑی کی کارکردگی کمزور بھی ہو تو کوئی دوسرا میچ جتوا کر کمی پوری کر لیتا ہے۔ “ہم چاہتے ہیں کہ ہر کھلاڑی ایک ایک میچ جتوائے تاکہ مضبوط کمبی نیشن بن سکے۔ وکٹ خشک ہے، اس لیے پہلے بیٹنگ بہتر رہے گی۔”
