اسلام آباد: امریکی وزیر خارجہ مارکو روبیو نے پاکستان کے ڈپٹی وزیراعظم و وزیر خارجہ اسحاق ڈار سے ٹیلی فون پر رابطہ کیا۔ اس رابطے میں دونوں ممالک کے درمیان تعلقات کے فروغ اور خطے کی تازہ صورتحال پر تبادلہ خیال کیا گیا۔
ترجمان دفتر خارجہ کے مطابق گفتگو میں پاکستان اور امریکہ کے تعلقات کو مثبت انداز میں آگے بڑھانے پر اعتماد کا اظہار کیا گیا۔ دونوں رہنماؤں نے مختلف شعبوں میں دوطرفہ تعاون کو مزید مضبوط بنانے کے عزم کا اعادہ بھی کیا۔
دفتر خارجہ کے بیان میں کہا گیا کہ اس موقع پر باہمی تعلقات، علاقائی اور عالمی پیش رفت پر بھی تفصیلی تبادلہ خیال ہوا۔
یہ رابطہ ایسے وقت میں ہوا ہے جب اسرائیل کی جانب سے قطر میں حماس کے رہنماؤں کے خلاف کارروائی پر مسلم دنیا کی جانب سے شدید تشویش پائی جا رہی ہے۔ پاکستان نے اس حملے کی سخت مذمت کرتے ہوئے اسے عالمی قوانین کی کھلی خلاف ورزی قرار دیا تھا۔
