لاہور کی انسداد دہشتگردی عدالت نے تحریک انصاف کے رہنما میاں محمود الرشید کی جناح ہاؤس حملہ کیس میں دائر ضمانت کی درخواست مسترد کر دی۔
انسداد دہشتگردی عدالت کے جج منظر علی گل نے کیس کی سماعت کی۔ دوران سماعت پراسیکیوشن نے مؤقف اختیار کیا کہ میاں محمود الرشید 9 مئی واقعات کے مرکزی ملزم ہیں اور ان کے خلاف چار مقدمات میں عدالتیں پہلے ہی سزا سنا چکی ہیں۔
پراسیکیوشن نے مزید کہا کہ عدالتوں کے فیصلوں سے یہ ثابت ہوچکا ہے کہ محمود الرشید بغاوت اور عوام کو فسادات پر اکسانے میں ملوث ہیں، لہٰذا ان کی ضمانت کی درخواست مسترد کی جائے۔
عدالت نے فریقین کے دلائل مکمل ہونے پر فیصلہ سناتے ہوئے میاں محمود الرشید کی ضمانت مسترد کردی۔
