نیویارک: اقوام متحدہ میں سعودی عرب اور فرانس کی سربراہی میں مسئلہ فلسطین کے دو ریاستی حل کے لیے سربراہی کانفرنس آج منعقد ہوگی، جس میں وزیراعظم پاکستان شہباز شریف بھی شریک ہوں گے۔
ترجمان دفتر خارجہ کے مطابق وزیراعظم شہباز شریف 22 سے 26 ستمبر تک اقوام متحدہ کی جنرل اسمبلی کے اجلاس میں شرکت کریں گے۔ اس دوران وہ کشمیریوں اور فلسطینیوں کے حقِ خود ارادیت پر زور دیں گے اور عالمی برادری کی توجہ غزہ کے انسانی بحران اور فلسطینی عوام کی مشکلات کی طرف مبذول کرائیں گے۔
وزیراعظم جنرل اسمبلی کے اجلاس سے خطاب میں دہشت گردی، ماحولیاتی تبدیلی اور اسلامو فوبیا سمیت دیگر عالمی مسائل پر پاکستان کا مؤقف پیش کریں گے۔
دفتر خارجہ کے ترجمان نے مزید بتایا کہ وزیراعظم شہباز شریف اعلیٰ سطحی تقریبات اور خصوصی اجلاسوں میں بھی شریک ہوں گے۔ اس موقع پر وہ اسلامی ممالک کے رہنماؤں کے ہمراہ امریکی صدر سے ملاقات کے علاوہ مختلف عالمی رہنماؤں اور اقوام متحدہ کے حکام کے ساتھ دو طرفہ ملاقاتیں بھی کریں گے۔
