خواجہ آصف کا عمران خان پر الزام — ہزاروں طالبان کو پاکستان لا کر بسایا، افغان مہمان اب واپس جائیں

اسلام آباد (نیوز ڈیسک) — وزیر دفاع خواجہ آصف نے پاکستان تحریک انصاف (پی ٹی آئی) کے چیئرمین عمران خان پر الزام عائد کرتے ہوئے کہا ہے کہ ہزاروں طالبان کو پاکستان لا کر بسایا گیا اور آج بھی پی ٹی آئی دہشت گردوں سے مذاکرات کی بات کر رہی ہے۔

سماجی رابطے کی ویب سائٹ “ایکس” (سابق ٹوئٹر) پر جاری بیان میں خواجہ آصف نے کہا کہ افغان حکومت کے ساتھ برسوں سے مذاکرات اور وفود کے کابل آنے جانے کے باوجود پاکستان میں خونریزی کا سلسلہ ختم نہیں ہوا۔

انہوں نے کہا کہ ہماری فوج اور عوام کا خون برسوں سے بہایا جا رہا ہے، روزانہ فوجی جوانوں کے جنازے اٹھ رہے ہیں جبکہ 60 لاکھ افغان مہاجرین کی 60 سالہ مہمان نوازی کی قیمت ہم اپنے خون سے ادا کر رہے ہیں۔

وزیر دفاع نے واضح کیا کہ اب وقت آگیا ہے کہ افغان مہمان اپنے گھروں کو واپس جائیں اور یہ محسن کشی اور مفت بری کا رویہ بند کریں۔ انہوں نے کہا کہ “یہ کیسے مہمان ہیں جو میزبانوں کا خون بہاتے ہیں اور قاتلوں کو پناہ دیتے ہیں؟”