راولپنڈی — پاک فوج کے شعبہ تعلقاتِ عامہ کے مطابق سکیورٹی فورسز نے ضلع اورکزئی میں دہشت گردی میں ملوث عناصر کے خلاف بڑی کارروائی کرتے ہوئے بھارتی حمایت یافتہ تمام 30 خوارجی دہشت گردوں کو جہنم واصل کر دیا۔
ترجمان آئی ایس پی آر کے مطابق یہ کارروائیاں 7 اکتوبر کے افسوسناک حملے کے بعد کی گئیں، جس میں لیفٹیننٹ کرنل جنید طارق، میجر طیّب راحت سمیت کئی جوانوں نے جامِ شہادت نوش کیا تھا۔
قابلِ اعتماد انٹیلی جنس اطلاعات کی بنیاد پر ضلع اورکزئی کے علاقے جمال مایہ میں آپریشن کیا گیا، جس کے دوران شدید فائرنگ کے تبادلے کے بعد دہشت گردی میں ملوث تمام مرکزی عناصر ہلاک کر دیے گئے۔
آئی ایس پی آر کے مطابق یہ کامیاب کارروائیاں اس بہیمانہ حملے کا جوابی بدلہ ہیں، اور دہشت گردوں کے خاتمے تک کلیئرنس آپریشن جاری رہے گا۔
بیان میں مزید کہا گیا کہ پاک فوج بھارتی سرپرستی میں ہونے والی دہشت گردی کے مکمل خاتمے کے لیے پرعزم اور ثابت قدم ہے۔
یاد رہے کہ اورکزئی آپریشن میں لیفٹیننٹ کرنل جنید طارق، میجر طیّب راحت، نائب صوبیدار اعظم گل، نائیک عادل حسین، نائیک گل امیر، لانس نائیک شیر خان، لانس نائیک طالب فراز، لانس نائیک ارشاد حسین، سپاہی طفیل خان، سپاہی عاقب علی اور سپاہی محمد نے دلیری اور بہادری سے جامِ شہادت نوش کیا۔
