لاہور (ویب ڈیسک) — پنجاب کے دارالحکومت لاہور میں اسموگ کی شدت برقرار ہے، جب کہ فضائی معیار (Air Quality Index) خطرناک حد کے قریب پہنچ گیا ہے۔
اسموگ نگرانی اور پیشگی نظام کی تازہ رپورٹ کے مطابق، لاہور میں فضائی آلودگی کی صورتحال آج دوپہر 12 بجے تک تشویشناک سطح تک پہنچنے کا امکان ظاہر کیا گیا تھا۔
محکمہ ماحولیات کے مطابق، بھارت سے چلنے والی آلودہ مشرقی ہواؤں کے باعث لاہور کا ایئر کوالٹی انڈیکس (AQI) 185 تک رہنے کی پیش گوئی کی گئی ہے، جو انسانی صحت کے لیے انتہائی نقصان دہ ہے۔
رپورٹ میں بتایا گیا کہ بھارت میں دیوالی کی تقریبات کے دوران شام کے وقت فضائی آلودگی میں عارضی اضافہ متوقع ہے۔ تاہم ای پی اے (Environmental Protection Agency) کی جانب سے لاہور کی فضا کی مسلسل نگرانی جاری ہے۔
محکمہ موسمیات کے مطابق، شہر کا درجہ حرارت 32 ڈگری سینٹی گریڈ تک جا سکتا ہے، جبکہ ہواؤں کی رفتار 6 کلومیٹر فی گھنٹہ رہنے کی پیش گوئی ہے۔ شہر میں بارش کے کوئی امکانات نہیں، جس کے باعث قدرتی طور پر آلودگی میں کمی کا امکان بھی نہ ہونے کے برابر ہے۔
رپورٹ کے مطابق، کم رفتار ہوائیں، فضائی دباؤ اور درجہ حرارت میں معمولی تبدیلی AQI میں اضافے کی بنیادی وجوہات ہیں، جب کہ شہر کے کچھ علاقوں میں آلودگی کے عارضی پیچز بھی ریکارڈ کیے گئے ہیں۔
متعلقہ محکموں اور ماہرین نے شہریوں پر زور دیا ہے کہ وہ دھوئیں یا آلودگی کے کسی بھی غیر معمولی اخراج کو 1373 پر رپورٹ کریں۔ ترجمان کے مطابق، ای پی اے انسدادِ اسموگ ایکشن پلان پر عملدرآمد یقینی بنا رہا ہے۔
