ہنگو میں دہشت گردوں کے دو مختلف حملوں کے نتیجے میں ایس پی آپریشنز اسد زبیر سمیت 3 پولیس اہلکار شہید جبکہ 2 زخمی ہوگئے۔
پولیس حکام کے مطابق دہشت گردوں نے پہلے ہنگو کے علاقے غلمینا میں ایک پولیس چیک پوسٹ کو بارودی مواد سے نشانہ بنایا، تاہم خوش قسمتی سے کوئی جانی نقصان نہیں ہوا۔
دھماکے کی اطلاع پر ایس پی آپریشنز اسد زبیر دیگر اہلکاروں کے ہمراہ جائے وقوعہ کی جانب روانہ ہوئے تو درابن کے مقام پر دہشت گردوں نے پولیس گاڑی کو بارودی مواد سے اڑا دیا۔
واقعے میں ایس پی اسد زبیر اور 2 پولیس اہلکار موقع پر ہی شہید ہوگئے جبکہ 2 زخمیوں کو ڈسٹرکٹ ہیڈ کوارٹر ہسپتال ہنگو منتقل کر دیا گیا ہے۔
پولیس نے علاقے میں سرچ آپریشن شروع کر دیا ہے اور اضافی نفری تعینات کر دی گئی ہے۔
وفاقی وزیر داخلہ محسن نقوی نے دھماکے کی شدید مذمت کرتے ہوئے شہداء کو خراجِ عقیدت پیش کیا اور کہا کہ ایس پی اسد زبیر اور ان کے ساتھیوں کی قربانی رائیگاں نہیں جائے گی۔
