راولپنڈی: انسداد دہشت گردی عدالت راولپنڈی نے وارنٹ گرفتاری کے باوجود علیمہ خان کے پیش نہ ہونے پر سخت اقدام اٹھاتے ہوئے ان کا شناختی کارڈ، پاسپورٹ بلاک کرنے اور بینک اکاؤنٹس منجمد کرنے کا حکم دے دیا۔
تھانہ صادق آباد کے نومبر احتجاج کیس کی سماعت جج امجد علی شاہ نے کی۔ سماعت کے دوران دس ملزمان عدالت میں پیش ہوئے جبکہ بانی تحریک انصاف عمران خان کی بہن علیمہ خان غیر حاضر رہیں۔
عدالت نے علیمہ خان کے مچلکے ضبط کرلیے جبکہ ضامن کے مفرور ہونے پر اس کی جائیداد قرق کرنے کا حکم جاری کیا۔
عدالت نے ڈی جی نادرا کو ہدایت دی کہ علیمہ خان کا قومی شناختی کارڈ بلاک کیا جائے، جبکہ ڈی جی پاسپورٹ کو پاسپورٹ بلاک کرنے اور اسٹیٹ بینک کو تمام بینک اکاؤنٹس منجمد کرنے کے احکامات دیے۔
جج امجد علی شاہ نے ریمارکس دیے کہ “ملزمہ ہر جگہ موجود ہوتی ہے مگر عدالت پیش نہیں ہوتی، اس کی حاضری ہر صورت یقینی بنائی جائے گی۔”
عدالت نے مقدمے کی سماعت 27 اکتوبر تک ملتوی کردی۔
یاد رہے کہ عدالت نے 22 اکتوبر کو علیمہ خان کے ناقابلِ ضمانت وارنٹ گرفتاری جاری کیے تھے۔ اس سے قبل پولیس افسران سعد ارشد اور نعیم کو جعلی رپورٹ جمع کرانے پر توہین عدالت کے نوٹس بھی جاری کیے گئے تھے۔
14 اور 20 اکتوبر کو بھی عدالت نے علیمہ خان کی غیر حاضری پر ناقابلِ ضمانت وارنٹ جاری کرتے ہوئے پولیس کو انہیں گرفتار کر کے پیش کرنے کا حکم دیا تھا۔
