ایبٹ آباد:ڈی جی آئی ایس پی آر لیفٹیننٹ جنرل احمد شریف چوہدری نے ایک بار پھر خبردار کرتے ہوئے کہا ہے کہ پاک فوج دفاع وطن کے لیے پرعزم ہے اور کسی بھی بیرونی جارحیت کا جواب سخت اور شدید ہوگا۔
ایبٹ آباد میں مختلف جامعات کے اساتذہ اور طلبا سے خصوصی نشست کے دوران گفتگو کرتے ہوئے ڈی جی آئی ایس پی آر نے کہا کہ پاکستان نے دہشت گردی اور فتنۃ الخوارج کے خلاف موثر اقدامات کیے ہیں، اور افواجِ پاکستان ملک کے امن و استحکام کے لیے ہر محاذ پر ڈٹی ہوئی ہے۔
انہوں نے پاک افغان کشیدگی، ملکی سلامتی کی صورتحال اور “معرکہ حق” جیسے اہم موضوعات پر تفصیلی گفتگو کی۔
اس موقع پر بڑی تعداد میں اساتذہ اور طلبا نے شرکت کی، جنہوں نے شہداء اور غازیانِ پاکستان کو خراجِ تحسین پیش کیا۔
وائس چانسلر ہزارہ یونیورسٹی، ڈاکٹر اکرام اللہ خان نے کہا کہ وطن سے محبت کا حقیقی استعارہ پاک فوج ہے، جو ہمیشہ محاذِ اول پر رہتی ہے، اور قوم اس کے ساتھ شانہ بشانہ کھڑی ہے۔
اساتذہ کا کہنا تھا کہ دشمن عناصر نوجوان نسل کے ذہنوں کو گمراہ کرنے کی کوشش کر رہے ہیں، اس لیے ضروری ہے کہ نوجوانوں کو درست اور مصدقہ معلومات فراہم کی جائیں۔
طلبا نے اظہارِ خیال کرتے ہوئے کہا کہ انہیں فخر ہے کہ وہ اس ملک کے شہری ہیں جہاں افواجِ پاکستان جیسے ادارے نوجوانوں کو حوصلہ، رہنمائی اور تحفظ فراہم کرتے ہیں۔
انہوں نے مزید کہا کہ ڈی جی آئی ایس پی آر کے جوابات نے ملکی و صوبائی حالات کے بارے میں ان کے ذہنوں میں پائے جانے والے ابہام دور کر دیے ہیں۔
