استنبول:پاکستان اور افغانستان نے ترکیے میں ہونے والے مذاکرات کے دوران جنگ بندی برقرار رکھنے پر اتفاق کرلیا۔ مذاکرات کے اختتام پر مشترکہ اعلامیہ جاری کیا گیا جس میں ترکی اور قطر کی ثالثی میں ہونے والے امن مذاکرات کی پیش رفت کا تفصیلی ذکر کیا گیا ہے۔اعلامیے کے مطابق پاکستان، افغانستان، ترکی اور قطر کے نمائندوں نے 25 سے 30 اکتوبر 2025 تک استنبول میں اجلاس منعقد کیے، جن کا مقصد دوحہ میں طے پانے والی جنگ بندی کو مضبوط بنانا تھا۔تمام فریقین نے جنگ بندی کے تسلسل پر اتفاق کرتے ہوئے فیصلہ کیا کہ اس کے عمل درآمد کے طریقہ کار پر مزید غور و خوض 6 نومبر 2025 کو استنبول میں ہونے والے اعلیٰ سطحی اجلاس میں کیا جائے گا۔مزید برآں، تمام فریقین نے ایک مانیٹرنگ اور تصدیقی نظام کے قیام پر بھی اتفاق کیا، جو امن کے تسلسل کو یقینی بنائے گا اور کسی بھی فریق کی جانب سے معاہدے کی خلاف ورزی کی صورت میں مناسب کارروائی کرے گا۔اعلامیے میں کہا گیا کہ ثالثوں کے طور پر ترکی اور قطر نے دونوں فریقوں کی فعال شمولیت پر اطمینان کا اظہار کیا ہے اور پائیدار امن و استحکام کے لیے مزید تعاون جاری رکھنے کے عزم کا اعادہ کیا ہے۔ذرائع کے مطابق، گزشتہ روز مذاکرات ناکامی کا شکار ہوگئے تھے تاہم ترکیے کی درخواست پر آج دوبارہ مذاکرات شروع کیے گئے۔پاکستانی وفد وطن واپسی کے لیے تیار تھا لیکن میزبانوں کی درخواست پر افغان طالبان کے ساتھ ایک اور ملاقات پر آمادگی ظاہر کی گئی۔مذاکرات کے دوران پاکستان نے اپنا مرکزی مطالبہ ایک بار پھر دہرایا کہ افغانستان اپنی سرزمین پر موجود دہشت گرد عناصر کے خلاف واضح، قابلِ تصدیق اور مؤثر کارروائی کرے تاکہ دونوں ممالک کے درمیان پائیدار امن قائم کیا جا سکے۔
