بنوں: سکیورٹی فورسز نے ضلع بنوں میں خفیہ اطلاع پر کارروائی کرتے ہوئے بھارتی سرپرستی میں سرگرم فتنۃ الخوارج کے 22 دہشت گردوں کو ہلاک کر دیا۔ آئی ایس پی آر کے مطابق 24 نومبر کو کی جانے والی اس کارروائی میں دہشت گردوں کے ٹھکانے کو مؤثر انداز میں نشانہ بنایا گیا، اور شدید فائرنگ کے تبادلے کے دوران تمام 22 دہشت گرد جہنم واصل ہوگئے۔
ترجمان پاک فوج نے بتایا کہ علاقے میں کلیئرنس اور سینیٹائزیشن آپریشن جاری ہے تاکہ کسی بھی روپوش دہشت گرد کو گرفتار یا انجام کو پہنچایا جا سکے۔ آئی ایس پی آر کا کہنا ہے کہ نیشنل ایکشن پلان اور فیڈرل ایپکس کمیٹی کے ویژن عزمِ استحکام کے تحت پاک فوج اور قانون نافذ کرنے والے ادارے انسدادِ دہشت گردی کی مہم پوری قوت کے ساتھ جاری رکھیں گے تاکہ بیرونی پشت پناہی یافتہ دہشت گردی کا مکمل خاتمہ یقینی بنایا جائے۔
دوسری جانب صدر مملکت آصف علی زرداری، وزیراعظم شہباز شریف اور وفاقی وزیر داخلہ محسن نقوی نے بنوں آپریشن میں کامیابی پر سکیورٹی فورسز کو خراج تحسین پیش کیا۔
ایوان صدر سے جاری بیان میں صدر مملکت نے دہشت گردوں کے خلاف مؤثر کارروائی کو سراہتے ہوئے کہا کہ بھارتی پراکسی فتنۃ الخوارج کا خاتمہ ریاست کی اولین ترجیح ہے، اور شہدا و غازی قوم کا فخر ہیں۔
وزیراعظم شہباز شریف نے کہا کہ عزمِ استحکام کے ویژن کے تحت سکیورٹی فورسز دہشت گردی کے خلاف اہم کامیابیاں حاصل کر رہی ہیں اور پوری قوم اس جنگ میں افواجِ پاکستان کے ساتھ یکجہتی سے کھڑی ہے۔
وفاقی وزیر داخلہ محسن نقوی نے بھی بنوں میں 22 بھارتی اسپانسرڈ دہشت گردوں کی ہلاکت پر فورسز کو سلام پیش کرتے ہوئے کہا کہ خیبرپختونخوا میں فتنۃ الہندوستان کے ناسور کا خاتمہ جاری ہے اور قوم کی حمایت سے اس کے ناپاک وجود کو مکمل طور پر ختم کیا جا رہا ہے۔
