اسلام آباد:دفترِ خارجہ نے کہا ہے کہ امریکا میں ہونے والا فائرنگ کا افسوس ناک واقعہ دنیا میں دہشت گردی کے دوبارہ سر اٹھانے کی علامت ہے۔ ترجمان نے ہفتہ وار پریس بریفنگ میں بتایا کہ پاکستان اس حملے کی شدید مذمت کرتا ہے اور جاں بحق افراد کے لواحقین سے دلی ہمدردی کا اظہار کرتا ہے۔
ترجمان نے کہا کہ واشنگٹن کا واقعہ عالمی سطح پر دہشت گردی کے خطرات کو دوبارہ اجاگر کرتا ہے اور اس تناظر میں عالمی برادری کو مشترکہ اقدامات کرنا ہوں گے۔
انہوں نے تاجکستان میں ڈرون حملے سے تین چینی شہریوں کی ہلاکت پر افسوس کا اظہار کرتے ہوئے کہا کہ اس واقعے کی ذمہ داری افغانستان پر عائد ہوتی ہے۔ افغانستان کو اپنی سرزمین دہشت گرد گروہوں کے استعمال سے روکنا ہوگا۔
ترجمان نے بھارتی وزیر دفاع کے سندھ سے متعلق بیان کو اشتعال انگیز اور عالمی سرحدی قوانین کی کھلی خلاف ورزی قرار دیتے ہوئے اسے یکسر مسترد کر دیا۔ انہوں نے کہا کہ پاکستان مسائل کے پرامن حل کا خواہاں ہے مگر قومی دفاع پر سمجھوتہ نہیں کیا جائے گا۔
آخر میں ترجمان نے بتایا کہ پاکستان اور ایران کے درمیان گیس پائپ لائن منصوبے پر بات چیت جاری ہے اور دونوں ممالک اس منصوبے کا قابلِ عمل حل تلاش کرنے کے لیے پرعزم ہیں۔
