امریکی صدر ڈونلڈ ٹرمپ نے واشنگٹن ڈی سی میں ایک نیشنل گارڈ اہلکار پر حملے کے بعد سخت ترین امیگریشن پالیسیوں کا اعلان کردیا ہے۔
یہ اعلان اس واقعے کے بعد سامنے آیا جس میں 29 سالہ افغان نژاد رحمان اللہ لاکنوال پر دو نیشنل گارڈز پر فائرنگ کا الزام ہے۔ حملے کے نتیجے میں 20 سالہ سارہ بیکسٹروم ہلاک جبکہ دوسرا اہلکار شدید زخمی ہوا۔
ٹرمپ نے کہا کہ وہ تمام “تھرڈ ورلڈ” ممالک سے امیگریشن کو مستقل طور پر معطل کر رہے ہیں، جبکہ 19 ممالک سے تعلق رکھنے والے گرین کارڈ ہولڈرز کی فوری آڈٹ کا حکم بھی دے دیا گیا ہے۔
انہوں نے سابق صدر جو بائیڈن کو شدید تنقید کا نشانہ بناتے ہوئے کہا کہ 2021 کے افغانستان انخلا کے دوران لاکھوں افراد کو بغیر مکمل اسکریننگ کے امریکا لایا گیا۔
پریس کانفرنس کے دوران ایک رپورٹر نے نشاندہی کی کہ مبینہ حملہ آور کو ویزہ ٹرمپ دور میں ملا تھا، جس پر ٹرمپ نے اسے ’’احمق‘‘ قرار دیتے ہوئے سوال مسترد کردیا۔
صدر ٹرمپ نے مزید اعلان کیا کہ وہ
- ایسے تمام غیر شہریوں کے وفاقی فوائد ختم کریں گے،
- امریکا کے لیے خطرہ سمجھے جانے والے تارکین وطن کی شہریت منسوخ کریں گے،
- اور ایسے تمام افراد کو ملک بدر کریں گے جو ’’مغربی تہذیب سے مطابقت نہیں رکھتے‘‘۔
