کراچی:نیپا کے قریب ایک افسوسناک واقعہ پیش آیا جہاں ایک کمسن بچہ کھلے برساتی نالے میں گر کر لاپتا ہوگیا۔ میئر کراچی مرتضیٰ وہاب نے میڈیا سے گفتگو میں واقعے پر شدید افسوس کا اظہار کرتے ہوئے کہا کہ اس سانحے کو غیر ضروری طور پر سیاسی بنانے کی کوشش کی جا رہی ہے، حالانکہ ایسے موقع پر سیاست نہیں بلکہ مدد اور تعاون کی ضرورت ہوتی ہے۔
مرتضیٰ وہاب نے واضح کیا کہ واقعہ جس علاقے میں پیش آیا وہ جماعتِ اسلامی کے ٹاؤن چیئرمین کے زیرِ انتظام ہے۔ انہوں نے کہا کہ اگر وہ سیدھی بات کریں تو کچھ حلقے ناراض ہوں گے، اسی لیے مکمل اور شفاف تحقیقات کا عمل جاری ہے تاکہ ذمہ داری کا تعین ہو سکے۔
میئر کراچی نے بتایا کہ یہ مقام سیوریج لائن نہیں بلکہ برساتی نالہ تھا، جہاں سے تقریباً 500 میٹر تک کھدائی کی جا چکی ہے اور بچے کی تلاش تیزی کے ساتھ جاری ہے۔ انہوں نے اپنے طور پر سی سی ٹی وی فوٹیج کا جائزہ لینے کا بھی ذکر کیا تاکہ واقعے کی اصل نوعیت سامنے لائی جا سکے۔
مرتضیٰ وہاب نے واٹر کارپوریشن کو حکم دیا ہے کہ کھدائی کے دوران مشینری روکنے کا حکم کس نے دیا تھا، اس کی فوری انکوائری کی جائے۔ انہوں نے کہا کہ اگر غفلت ثابت ہوئی تو متعلقہ اہلکاروں کے خلاف سخت کارروائی کی جائے گی۔
میئر کا کہنا تھا کہ گزشتہ ایک سال میں شہر بھر میں 88 ہزار مین ہول کور لگائے گئے تھے اور 55 فیصد یوسیز کو ڈھکن فراہم کیے گئے تھے، لیکن اس مقام کے بارے میں کوئی شکایت انہیں موصول نہیں ہوئی تھی۔ انہوں نے کہا کہ حکومت متاثرہ خاندان کے ساتھ کھڑی ہے اور انہیں ہر ممکن مدد فراہم کی جائے گی۔
