اسلام آباد — قومی اسمبلی میں جمع کروائے گئے تحریری جواب میں وزیر خارجہ اسحاق ڈار نے انکشاف کیا ہے کہ دنیا بھر کی مختلف جیلوں میں 21 ہزار 647 پاکستانی شہری قید ہیں۔ یہ اعدادوشمار پاکستانی شہریوں کے بیرونِ ملک قانونی مسائل کی سنگینی کو ظاہر کرتے ہیں۔
جواب کے مطابق بھارت میں 738 پاکستانی شہری قید ہیں، تاہم بھارت کی جانب سے ان افراد کے جرائم کے بارے میں کوئی معلومات فراہم نہیں کی جا رہیں۔
سعودی عرب میں 10 ہزار 745 پاکستانی قید ہیں، جن میں کچھ سزا یافتہ جبکہ اکثریت کے مقدمات زیرِ سماعت ہیں۔ اسی طرح متحدہ عرب امارات میں 5 ہزار 297 پاکستانی شہری قید ہیں، لیکن ان کے خلاف درج مقدمات کی نوعیت کے بارے میں تفصیلات دستیاب نہیں۔
رپورٹ کے مطابق چین میں 652 پاکستانی مختلف جرائم جیسے منشیات کی اسمگلنگ، جعلی کرنسی، دھوکا دہی اور غیر قانونی امیگریشن کے الزامات میں قید ہیں۔
دیگر ممالک میں قید پاکستانیوں کی تعداد کچھ یوں ہے:
- قطر: 599
- عمان: 578
- ملائیشیا: 444
- اٹلی: 353
- بحرین: 218
- ترکیہ: 190
- امریکا: 141
- افغانستان: 91
تحریری جواب میں بتایا گیا کہ بیرون ملک قید 13 ہزار 78 پاکستانیوں کے مقدمات زیرِ سماعت ہیں، جبکہ 8 ہزار 569 پاکستانی سزا یافتہ ہیں۔
یہ اعدادوشمار بیرون ممالک سفر کرنے والے پاکستانیوں کیلئے قانونی احتیاط، سفارتی مدد اور حکومتی سپورٹ کے مزید مؤثر نظام کی ضرورت کو اجاگر کرتے ہیں۔
