نیوزی لینڈ کے شہر آکلینڈ میں ایک شخص کو مبینہ طور پر قیمتی سونے اور ہیرے جڑے لاکٹ کو نگل کر چوری کرنے کی کوشش کے الزام میں گرفتار کر لیا گیا۔ پولیس کے مطابق یہ لاکٹ ’فیبرجے ایگ‘ طرز کا ہے جس کی مالیت تقریباً 19 ہزار 300 ڈالر ہے۔
واقعہ اس وقت پیش آیا جب ایک جیولری شاپ نے مشتبہ شخص کے غیر معمولی رویے کی بنا پر پولیس کو طلب کیا۔ 32 سالہ ملزم کا طبی معائنہ کرایا گیا، تاہم حیران کن طور پر لاکٹ اس سے برآمد نہیں ہوسکا۔
جیولرز کے مطابق چوری شدہ لاکٹ 60 سفید ہیروں اور 15 نیلے نیلم سے مزین ہے، اور اسے کھولنے پر اندر 18 قیراط سونے کا ننھا آکٹوپس موجود ہوتا ہے۔ اس منفرد ڈیزائن کو ’آکٹوپسی ایگ‘ کا نام دیا گیا ہے، جسے 1983 کی جیمز بانڈ فلم Octopussy سے متاثر ہو کر تیار کیا گیا تھا۔
ملزم کو 8 دسمبر کو دوبارہ عدالت میں پیش کیا جائے گا۔
