برسبین کے گابا میں جاری دوسرے ایشیز ٹیسٹ کی پہلی اننگز میں انگلینڈ کی ٹیم 334 رنز پر آل آؤٹ ہوگئی۔ دوسرے روز کھیل کا آغاز گزشتہ اسکور 325/9 سے ہوا مگر انگلش ٹیم مجموعی اسکور میں صرف 9 رنز کا اضافہ ہی کر سکی۔
اننگز کے دوران جوفرا آرچر نے 38 رنز بنائے لیکن مارنس لبوشین نے ہوا میں دائیں جانب ڈائیو لگاتے ہوئے ان کا شاندار کیچ پکڑا۔ دوسری جانب جو روٹ نے شاندار بیٹنگ کا مظاہرہ کرتے ہوئے 138 رنز کی ناقابلِ شکست اننگز کھیلی، جو آسٹریلیا کی سرزمین پر ان کی پہلی ٹیسٹ سنچری ہے۔ اس کے ساتھ ہی وہ ٹیسٹ کریئر میں 40 سنچریز مکمل کرنے والے چوتھے بیٹر بھی بن گئے۔
آسٹریلیا کی جانب سے مچل اسٹارک نے شاندار بولنگ کرتے ہوئے 6 وکٹیں حاصل کیں جبکہ مائیکل نیسر، برینڈن ڈوگٹ اور اسکاٹ بولینڈ نے ایک ایک وکٹ حاصل کی۔
یہ جنوری 2018 کے بعد پہلا موقع ہے کہ انگلینڈ نے آسٹریلیا میں کسی ٹیسٹ اننگز میں 300 سے زائد رنز بنائے ہیں۔
قبل ازیں، انگلینڈ نے ٹاس جیت کر بیٹنگ کا فیصلہ کیا لیکن پہلی ہی اوور میں بین ڈکٹ گولڈن ڈک پر آؤٹ ہوگئے جبکہ تیسرے اوور میں اولی پوپ بھی بغیر رن بنائے پویلین لوٹ گئے۔ بعد ازاں زیک کرولی اور جو روٹ نے 117 رنز کی اہم شراکت قائم کی۔ کرولی 76 رنز بنا کر آؤٹ ہوئے جبکہ ہیری بروک نے 31 رنز بنائے لیکن مچل اسٹارک کی گیند پر وکٹ گنوا بیٹھے — یہ اسٹارک کی ٹیسٹ کیریئر کی 415ویں وکٹ تھی جس کے ساتھ انہوں نے وسیم اکرم کو پیچھے چھوڑتے ہوئے سب سے زیادہ ٹیسٹ وکٹیں لینے والے لیفٹ آرم فاسٹ بولر کا اعزاز حاصل کرلیا۔
بین اسٹوکس، جیمی اسمتھ، ول جیکس، گس ایٹکنسن اور برائیڈن کارس خاطرخواہ کارکردگی نہ دکھا سکے اور جلد وکٹیں گنوا بیٹھے۔
