یورو وژن 2026 کے میوزک مقابلے میں ایک بڑا تنازع سامنے آ گیا ہے، جب آئرلینڈ، نیدرلینڈز، سلووینیا اور اسپین نے اعلان کیا کہ وہ آئندہ سال مقابلے میں حصہ نہیں لیں گے۔
یہ فیصلہ اسرائیل کی شرکت کے معاملے پر یورپی براڈکاسٹنگ یونین (EBU) کے اعلان کے فوراً بعد سامنے آیا، جس میں کہا گیا کہ اسرائیل مقابلے سے خارج نہیں ہوگا اور اس کے حقِ شرکت کو برقرار رکھا جائے گا۔
مذکورہ ممالک نے بائیکاٹ کی وجوہات میں غزہ میں اسرائیلی کارروائیوں، انسانی حقوق کی خلاف ورزیاں اور مبینہ سیاسی مداخلت کو قرار دیا۔
- آئرلینڈ کے براڈکاسٹر RTE نے “انسانی بحران اور ہولناک جانی نقصان” کو وجہ بتایا۔
- نیدرلینڈز نے کہا کہ موجودہ حالات میں اسرائیل کی موجودگی عوامی اقدار کے خلاف ہے۔
- سلووینیا نے 20 ہزار شہید ہونے والے بچوں کے احترام میں مقابلے سے دستبرداری کا اعلان کیا۔
- اسپین کے RTVE نے اسرائیل کی جانب سے مقابلے کو سیاسی مقاصد کے لیے استعمال کرنے کو یورو وژن کی غیرجانبدار حیثیت کے خلاف قرار دیا۔
دوسری جانب جرمنی نے واضح کیا کہ اگر اسرائیل کو نکالا گیا تو وہ بھی مقابلے میں حصہ نہیں لے گا۔ اسرائیلی صدر اسحاق ہرتزوگ نے EBU کے فیصلے کا خیرمقدم کرتے ہوئے کہا کہ اسرائیل ہر بین الاقوامی پلیٹ فارم پر نمائندگی کا حق رکھتا ہے۔
