ڈبلن، آئرلینڈ — آئرش سیکیورٹی اداروں نے ہنگامی الرٹ جاری کیا جب آئرش بحریہ نے ڈبلن ایئرپورٹ کے شمال مشرق میں پانچ مشکوک ڈرونز کو یوکرینی صدر ولادیمیر زیلنسکی کے فلائٹ روٹ کے قریب پرواز کرتے دیکھا۔
رپورٹس کے مطابق ڈرونز اسی مقام تک پہنچے جہاں سے صدر زیلنسکی کا طیارہ گزرنا تھا، مگر خوش قسمتی سے طیارہ مقررہ وقت سے پہلے لینڈ کر چکا تھا، جس کی وجہ سے کسی قسم کا خطرہ لاحق نہیں ہوا۔ آئرش حکام نے صورتحال سے یوکرینی سیکیورٹی کو آگاہ کیا، تاہم صدر کے دورے کے شیڈول یا سیکیورٹی پلان میں کوئی تبدیلی نہیں کی گئی۔
دوسری جانب، روسی صدر ولادیمیر پیوٹن نے ایک سخت بیان میں کہا کہ اگر یورپ جنگ چاہتا ہے تو روس مکمل تیار ہے۔ پیوٹن نے یورپی ممالک پر الزام لگایا کہ وہ یوکرین امن معاہدے کو سبوتاژ کر رہے ہیں اور ان کے پاس امن کا کوئی ایجنڈا نہیں۔
پیوٹن کے مطابق یورپی ممالک کا اصل مقصد امریکی صدر ڈونلڈ ٹرمپ کی کوششوں کو یوکرین میں امن قائم کرنے سے روکنا ہے۔ انہوں نے واضح کیا کہ اگر یورپ زمینی حقائق تسلیم کرے تو روس مذاکرات کے لیے دروازہ کھلا رکھے گا، لیکن جنگ شروع ہونے کی صورت میں “مذاکرات کے لیے کوئی نہیں بچے گا”۔
