اسلام آباد:پاکستان اور ایشیائی ترقیاتی بینک (اے ڈی بی) کے درمیان 257 ملین ڈالر مالیت کے دو اہم ترقیاتی معاہدوں پر دستخط ہو گئے ہیں۔ دستخط سیکرٹری اقتصادی امور محمد حمیر کریم اور اے ڈی بی کی کنٹری ڈائریکٹر ایما فین کے درمیان ہوئے، جبکہ حکومت پنجاب کی جانب سے سیکرٹری اسکول ایجوکیشن اور سیکرٹری اسپیشلائزڈ ہیلتھ کیئر نے معاہدوں پر دستخط کیے۔
ترجمان وزارت اقتصادی امور کے مطابق پنجاب میں تعلیم اور صحت کے شعبوں میں بہتری کے لیے دو بڑے پروگرام شروع کیے جا رہے ہیں۔ اے ڈی بی نے 107 ملین ڈالر کے ایس ٹی ای ایم ایجوکیشن پروگرام کی منظوری دی ہے، جس کے ذریعے جدید لیبارٹریز قائم کی جائیں گی اور سیکنڈری سطح کے اساتذہ کی تربیت کی جائے گی۔
اس کے علاوہ 150 ملین ڈالر کا نرسنگ و ہیلتھ ورکس فورس ریفارم پروگرام بھی شامل ہے، جس کے تحت لاہور، ملتان اور راولپنڈی میں نرسنگ کے تین سینٹرز آف ایکسی لینس قائم کیے جائیں گے۔
ترجمان کے مطابق اے ڈی بی کی معاونت سماجی شعبے میں مستقل اور پائیدار ترقی کا سنگِ میل ثابت ہوگی۔ اے ڈی بی کنٹری ڈائریکٹر نے کہا کہ دونوں پروگرام نتائج پر مبنی ہیں اور نظامی اصلاحات کا اہم حصہ ہیں۔
