پاکستان اور ترکیہ کے تعلقات میں اقتصادی اور دفاعی تعاون ایک نئے دور میں داخل ہو چکا ہے۔ اسپیشل انویسٹمنٹ فیسلٹی کونسل (ایس آئی ایف سی) کی مؤثر پالیسیوں کے باعث دونوں برادر ممالک کے درمیان سرمایہ کاری اور صنعتی اشتراک کے نئے مواقع پیدا ہو رہے ہیں۔
اسی سلسلے میں وفاقی وزیر تجارت جام کمال خان نے ترکیہ کے اعلیٰ سطحی وفد سے اہم ملاقات کی، جس میں ایوی ایشن، ایرو اسپیس انجینئرنگ، ڈرون ٹیکنالوجی، دفاعی نظام، آٹوموٹیو انجینئرنگ اور ایڈوانسڈ میٹریلز کے ماہرین شریک تھے۔
ملاقات کے دوران پاکستان اور ترکیہ نے ایوی ایشن، دفاعی پیداوار اور ہائی ٹیک صنعتوں میں تعاون مزید بڑھانے کے عزم کا اعادہ کیا۔ ترک وفد نے پاکستان میں مشترکہ منصوبوں، ٹیکنالوجی ٹرانسفر اور مقامی سطح پر مینوفیکچرنگ میں گہری دلچسپی کا اظہار کیا۔
دونوں ممالک کے درمیان دیرینہ شراکت داری کو مزید مضبوط بنانے، ایرو اسپیس، دفاعی پیداوار اور معدنی وسائل کی ترقی میں وسیع تعاون پر اتفاق کیا گیا۔ اس موقع پر پاکستان کے مضبوط انجینئرنگ بیس اور قیمتی معدنی وسائل کو مشترکہ صنعتی ترقی کی بنیاد قرار دیا گیا۔
ماہرین کے مطابق ترک سرمایہ کاری سے پاکستان کی صنعتی پیداوار اور برآمدات میں نمایاں اضافہ متوقع ہے جبکہ مشترکہ منصوبے ملکی سطح پر ہائی ٹیک مینوفیکچرنگ اور جدید ٹیکنالوجی کے فروغ میں اہم کردار ادا کریں گے۔ اقتصادی و دفاعی ترقی کے اس سفر میں ایس آئی ایف سی کا کردار کلیدی حیثیت رکھتا ہے۔
