چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کہا ہے کہ پاک فوج اندرونی و بیرونی چیلنجز، انتہاپسندانہ نظریات اور قومی استحکام کو نقصان پہنچانے والی تقسیم پسند قوتوں کے خلاف پوری طرح تیار اور پرعزم ہے۔
انہوں نے گوجرانوالہ اور سیالکوٹ گیریژن کا دورہ کیا جہاں انہیں فارمیشنز کی آپریشنل تیاریوں اور جنگی صلاحیتوں میں اضافے کے لیے کیے گئے اقدامات پر بریفنگ دی گئی۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل نے فیلڈ ٹریننگ ایکسرسائز اور جدید سمیولیٹر ٹریننگ سہولت کا مشاہدہ کیا اور فارمیشن کے اعلیٰ پیشہ ورانہ معیار اور مجموعی تیاری کو سراہا۔
آئی ایس پی آر کا کہنا ہے کہ فیلڈ مارشل سید عاصم منیر نے جدید جنگی ماحول میں ٹیکنالوجی سے ہم آہنگی، بروقت فیصلوں اور حالات سے باخبر رہنے کی اہمیت پر زور دیا۔ انہوں نے افسران اور جوانوں سے گفتگو کے دوران ان کے بلند حوصلے اور قومی سلامتی کے لیے غیر متزلزل عزم کی تعریف کی۔
فیلڈ مارشل نے سخت، مقصد پر مبنی تربیت کو وقت کی اہم ضرورت قرار دیتے ہوئے کہا کہ پاک فوج ہر قسم کے خطرات سے نمٹنے کے لیے ہمہ وقت تیار ہے۔ گوجرانوالہ پہنچنے پر کور کمانڈر گوجرانوالہ نے چیف آف آرمی اسٹاف و چیف آف ڈیفنس فورسز کا استقبال کیا۔
