اسلام آباد میں بجلی صارفین کے لیے خوش آئند خبر سامنے آئی ہے، جہاں بجلی کی فی یونٹ قیمت میں کمی کا امکان ظاہر کیا جا رہا ہے۔ نومبر کی ماہانہ فیول ایڈجسٹمنٹ کے تحت بجلی 72 پیسے فی یونٹ سستی ہو سکتی ہے۔
سینٹرل پاور پرچیزنگ ایجنسی (سی پی پی اے) نے اس حوالے سے نیشنل الیکٹرک ریگولیٹری اتھارٹی (نیپرا) میں درخواست دائر کر دی ہے، جس پر نیپرا 31 دسمبر کو سماعت کرے گی۔ درخواست کی منظوری کی صورت میں صارفین کو ریلیف ملنے کا امکان ہے۔
نیپرا میں جمع کرائی گئی دستاویزات کے مطابق نومبر کے مہینے میں ڈسکوز کو مجموعی طور پر 7 ارب 81 کروڑ 30 لاکھ یونٹس بجلی فراہم کی گئی، جبکہ اس دوران بجلی کی فی یونٹ لاگت 6 روپے 16 پیسے رہی۔
دستاویزات میں بتایا گیا ہے کہ نومبر کے دوران بجلی کی پیداوار کے لیے مختلف ذرائع استعمال کیے گئے، جن میں 39.16 فیصد پانی، 9.34 فیصد مقامی کوئلہ، 5.06 فیصد درآمدی کوئلہ، 8.44 فیصد گیس، 8.64 فیصد درآمدی ایل این جی اور 25.23 فیصد جوہری ایندھن شامل ہے۔
نیپرا کی جانب سے درخواست منظور ہونے کی صورت میں بجلی صارفین کو نومبر کی ماہانہ فیول ایڈجسٹمنٹ کے تحت 72 پیسے فی یونٹ سستی بجلی فراہم کی جائے گی۔
