اسلام آباد:وزیر خزانہ محمد اورنگزیب نے کہا ہے کہ پاکستان معاشی استحکام حاصل کرنے کے بعد اب ترقی کے مرحلے میں داخل ہو چکا ہے، جبکہ حالیہ معاشی اصلاحات کے باعث ملکی اور عالمی سطح پر اعتماد میں نمایاں اضافہ ہوا ہے۔
امریکی اخبار یو ایس اے ٹوڈے کو دیے گئے انٹرویو میں وزیر خزانہ نے بتایا کہ مہنگائی 38 فیصد سے کم ہو کر سنگل ڈیجٹ میں آ چکی ہے، جبکہ زرمبادلہ کے ذخائر 14.5 ارب ڈالر سے تجاوز کر گئے ہیں، جو معیشت کے لیے ایک مثبت اشارہ ہے۔
محمد اورنگزیب کا کہنا تھا کہ پرائمری بجٹ اور کرنٹ اکاؤنٹ سرپلس کا حصول ایک اہم سنگ میل ہے۔ شرح مبادلہ میں استحکام کے باعث سرمایہ کاروں کا اعتماد بحال ہوا ہے، اگرچہ 2.7 فیصد معاشی شرح نمو مثبت ہونے کے باوجود ناکافی ہے۔ انہوں نے کہا کہ ٹیکس، توانائی اور سرکاری اداروں میں اصلاحات کا عمل جاری ہے۔
وزیر خزانہ نے انکشاف کیا کہ پاکستان کی آئی ٹی برآمدات چار ارب ڈالر سے تجاوز کر چکی ہیں اور آئندہ پانچ سال میں ان کے دوگنا ہونے کا امکان ہے۔ نجکاری اور ٹیرف اصلاحات سے عالمی منڈی میں پاکستان کی مسابقت بڑھے گی، جبکہ عالمی بینک کے مطابق پاکستان میں ایسٹ ایشیا مومنٹ جیسی معاشی پیش رفت کے امکانات موجود ہیں۔
انہوں نے کہا کہ خواتین کی تعلیم اور لیبر فورس میں شمولیت معاشی ترقی کے لیے ناگزیر ہے، جبکہ موسمیاتی تبدیلی جیسے بڑے چیلنجز سے نمٹنے کے لیے عالمی تعاون کی ضرورت ہے۔ زراعت، معدنیات اور ڈیجیٹل معیشت میں سرمایہ کاری کے وسیع مواقع موجود ہیں۔ انہوں نے بلوچستان کے ٹیتھیان کاپر بیلٹ، ڈیٹا سینٹرز، مصنوعی ذہانت (AI) اور ڈیجیٹل سروسز کو مستقبل کی معیشت کے اہم ستون قرار دیا۔
وزیر خزانہ نے کہا کہ پاکستان اب تجارت اور سرمایہ کاری کے لیے تیار ہے اور بحران سے نکل کر مواقع کی معیشت کی جانب اپنا سفر شروع کر چکا ہے۔ اس موقع پر امریکی اخبار نے پاکستان پر ایک خصوصی رپورٹ بھی شائع کی ہے۔
