ممبئی: بالی ووڈ اداکارہ ملائکہ اروڑا ایک بار پھر اپنی ذاتی زندگی کے باعث خبروں کی زینت بن گئی ہیں، جہاں ایک نامعلوم شخص کے ساتھ ان کی حالیہ ویڈیو نے سوشل میڈیا پر ڈیٹنگ کی نئی افواہوں کو جنم دے دیا ہے۔
سوشل میڈیا پر وائرل ہونے والی ویڈیو میں ملائکہ اروڑا کو ایئرپورٹ سے باہر نکلتے ہوئے دیکھا جا سکتا ہے۔ وہ آرام دہ لباس میں ملبوس تھیں، جبکہ ان کے ساتھ موجود ایک شخص نے سیاہ ٹی شرٹ، نیلی جینز، ٹوپی اور چشمہ پہن رکھا تھا۔
ویڈیو میں دونوں کو ایک ساتھ ایئرپورٹ سے باہر آتے اور ساتھ چلتے ہوئے دیکھا گیا، جبکہ مذکورہ شخص اردگرد موجود افراد سے خوش اخلاقی سے بھی ملتا رہا۔
اگرچہ اس ویڈیو کے بعد سوشل میڈیا پر دونوں کے تعلق سے متعلق مختلف قیاس آرائیاں کی جا رہی ہیں، تاہم ملائکہ اروڑا یا ان کی ٹیم کی جانب سے اس حوالے سے کوئی باضابطہ بیان سامنے نہیں آیا، اس لیے ان افواہوں کی آزادانہ طور پر تصدیق نہیں ہو سکی۔
