اسلام آباد (آواز نیوز):پاکستان نے یوکرین کے صدر ولادیمیر زیلنسکی کی جانب سے یوکرین-روس جنگ میں پاکستانی شہریوں کی مبینہ شمولیت کے الزام کو سختی سے مسترد کر دیا ہے۔ دفتر خارجہ نے واضح کیا ہے کہ یوکرینی حکام نے اپنے دعوے کے حق میں نہ تو کوئی قابل تصدیق ثبوت پیش کیے ہیں اور نہ ہی پاکستان کو باضابطہ طور پر آگاہ کیا گیا ہے۔وزارت خارجہ کے ترجمان نے کہا کہ ایسے الزامات بے بنیاد ہیں، اور پاکستان یہ معاملہ باضابطہ طور پر یوکرینی حکام کے ساتھ اٹھائے گا۔ پاکستان نے اپنے مؤقف کا اعادہ کرتے ہوئے کہا ہے کہ وہ اقوام متحدہ کے چارٹر کے مطابق مذاکرات اور سفارتکاری کے ذریعے یوکرین تنازع کے پرامن حل کی حمایت کرتا ہے۔واضح رہے کہ یوکرینی صدر زیلنسکی نے ایک بیان میں دعویٰ کیا تھا کہ شمال مشرقی یوکرین میں روس کی جانب سے پاکستان، چین، تاجکستان، ازبکستان اور افریقی ممالک سے تعلق رکھنے والے کرائے کے جنگجو استعمال کیے جا رہے ہیں۔ اس سے قبل وہ چین اور شمالی کوریا پر بھی ایسے الزامات لگا چکے ہیں، جن کی ان ممالک نے تردید کی تھی۔
