نیویارک (آواز نیوز):ری پبلکن سینیٹر ٹیڈ بڈ نے اسرائیلی وزیر اعظم بنجمن نیتن یاہو کو نیویارک میں گرفتاری سے بچانے کے لیے ایک بل پیش کیا ہے۔ واشنگٹن ٹائمز کے مطابق، اس اقدام کا مقصد نیتن یاہو کو نیویارک شہر کے منتخب میئر ظہران ممدانی سے ممکنہ گرفتاری کے خطرے سے محفوظ رکھنا ہے۔
نارتھ کیرولائنا کے سینیٹر بڈ کی پیش کردہ قانون سازی کے تحت کسی بھی امریکی ریاست یا مقامی حکومت کو چار سال تک محکمہ انصاف کی گرانٹ سے محروم کیا جا سکتا ہے اگر وہ نیٹو یا بڑے غیر نیٹو اتحادی کے اہلکار کے خلاف بین الاقوامی فوجداری عدالت (ICC) کے وارنٹ کو نافذ کرتی ہے۔
سینیٹر بڈ نے کہا کہ میئر ممدانی کے اسرائیل مخالف تبصرے اور نیتن یاہو کی ممکنہ گرفتاری کا وعدہ نہ صرف مضحکہ خیز بلکہ خطرناک ہے، اور یہ امریکہ کے قریبی اتحادیوں اور شراکت داروں کے ساتھ تعلقات کو نقصان پہنچا سکتا ہے۔
واضح رہے کہ 21 نومبر 2024 کو ICC نے نیتن یاہو اور اسرائیل کے سابق وزیر دفاع کے خلاف گرفتاری کے وارنٹ جاری کیے تھے۔ سینیٹر بڈ نے مزید کہا کہ امریکہ اخلاقی طور پر ICC کے پابند نہیں ہے اور وزیر اعظم نیتن یاہو کی اقوام متحدہ میں شرکت کو روکنے کی کوشش اسرائیل کے لیے حساس وقت میں نقصان دہ ہو سکتی ہے۔
