واشنگٹن:
امریکی صدر ڈونلڈ ٹرمپ نے ایک غیر معمولی اقدام کرتے ہوئے اپنے سوشل میڈیا پلیٹ فارم ٹروتھ سوشل پر ایک تصویر شیئر کی ہے، جس میں انہوں نے خود کو “Acting President of Venezuela” (وینزویلا کا عبوری صدر) قرار دیا ہے۔
بین الاقوامی خبر ایجنسی کے مطابق شیئر کی گئی تصویر میں ڈونلڈ ٹرمپ کی سرکاری تصویر کے ساتھ تحریر موجود ہے کہ وہ جنوری 2026 سے وینزویلا کے عبوری صدر ہیں، جبکہ اسی تصویر میں انہیں امریکا کے 45ویں اور 47ویں صدر کے طور پر بھی ظاہر کیا گیا ہے۔
یہ پیش رفت ایسے وقت میں سامنے آئی ہے جب امریکا نے حال ہی میں وینزویلا میں فوجی کارروائی کی، جس کے بعد وینزویلا کے صدر نکولس مادورو کو گرفتار کر کے نیویارک منتقل کیا گیا۔ امریکی حکام کے مطابق مادورو پر منشیات اسمگلنگ سمیت سنگین الزامات کے تحت فردِ جرم عائد کی گئی ہے۔
امریکی حکام کا کہنا ہے کہ عبوری دور میں امریکا وینزویلا میں سیاسی منتقلی کے عمل کی نگرانی کرے گا۔ دوسری جانب وینزویلا کی نائب صدر اور وزیرِ تیل ڈیلسی روڈریگز نے بطور عبوری صدر حلف بھی اٹھا لیا ہے۔
ٹرمپ کی اس پوسٹ نے عالمی سطح پر شدید ردعمل اور بحث کو جنم دے دیا ہے، جبکہ بین الاقوامی برادری کی جانب سے تاحال اس اقدام پر کوئی متفقہ مؤقف سامنے نہیں آیا۔
