کراچی (مانیٹرنگ ڈیسک) — پاکستان نے متحدہ عرب امارات (یو اے ای) کو 2 ارب ڈالر کی خطیر رقم واپس ادا کر دی ہے۔ یہ رقم اسٹیٹ بینک آف پاکستان میں بطور سیف ڈپازٹ موجود تھی۔
ترجمان اسٹیٹ بینک کے مطابق، پاکستان اس ڈپازٹ پر 6 فیصد سالانہ شرح سود ادا کر رہا تھا۔ ذرائع وزارت خزانہ کا کہنا ہے کہ گزشتہ دنوں بدلتی ہوئی بین الاقوامی معاشی صورتحال کے پیش نظر یو اے ای نے اس رقم کی فوری واپسی کا مطالبہ کیا تھا، جس پر پاکستان نے ادائیگی کا فیصلہ کیا۔
دوسری جانب پاکستان کے زرمبادلہ کے ذخائر کو اس ادائیگی سے کوئی خاص دھچکا نہیں لگا، کیونکہ تقریباً اسی دوران سعودی عرب سے 2 ارب ڈالر کی خطیر امدادی رقم پاکستان کے خزانے میں موصول ہوئی ہے۔ سعودی عرب نے پاکستان میں مزید 3 ارب ڈالر کے ڈپازٹ کو طویل مدتی بنیادوں پر رکھنے کی یقین دہانی بھی کرائی ہے۔
واضح رہے کہ پاکستان نے گزشتہ ہفتے 50 کروڑ ڈالر کے یورو بانڈز بھی جاری کیے تھے، جس سے قرضوں کی ادائیگی اور غیر ملکی زرمبادلہ کے ذخائر کو مستحکم رکھنے میں مدد ملی ہے۔
